இந்தியா "ஏ' அணி ஏமாற்றம்

கிங்ஸ்டவுன்: வெஸ்ட் இண்டீஸ் "ஏ' அணியின் துல்லிய பந்துவீச்சில் சிதறிய இந்தியா "ஏ' அணி முதல் இன்னிங்சில் 202 ரன்களுக்கு சுருண்டது.

இந்தியா "ஏ' மற்றும் வெஸ்ட் இண்டீஸ் "ஏ' அணிகளுக்கு இடையிலான இரண்டாவது நான்கு நாள் போட்டி கிங்ஸ்டவுனில் நடக்கிறது. முதல் நாள் ஆட்டநேர முடிவில், முதல் இன்னிங்சில் வெஸ்ட் இண்டீஸ் "ஏ' அணி 8 விக்கெட்டுக்கு 212 ரன்கள் எடுத்திருந்தது.

ஷாமி அபாரம்:

இரண்டாம் நாள் ஆட்டத்தில் முதல் இன்னிங்சை தொடர்ந்த வெஸ்ட் இண்டீஸ் அணியின் பிராத்வைட் (66), தேவேந்திர பிஷூ (2) நிலைக்கவில்லை. முதல் இன்னிங்சில் வெஸ்ட் இண்டீஸ் அணி 217 ரன்கள் எடுத்தது. ஜான்சன் (3) அவுட்டாகாமல் இருந்தார். இந்தியா சார்பில் ஷாமி அகமது 4, அசோக் டிண்டா, ரோகித் சர்மா தலா 2 விக்கெட் கைப்பற்றினர்.

புஜாரா ஆறுதல்:

பின், முதல் இன்னிங்சை துவக்கிய இந்திய அணிக்கு அபிமன்யு முகுந்த் (8), ஷிகர் தவான் (0) ஜோடி மோசமான துவக்கம் கொடுத்தது. அடுத்து வந்த அஜின்கியா ரகானே (18), ரோகித் சர்மா (1) ஏமாற்றினர். விக்கெட் ஒருபுறம் சரிந்தாலும் மறுமுனையில் பொறுப்பாக ஆடிய கேப்டன் புஜாரா, அரைசதம் அடித்தார். இவர், 67 ரன்களுக்கு அவுட்டானார்.

பெர்மால் அசத்தல்:

"மிடில்-ஆர்டரில்' களமிறங்கிய மனோஜ் திவாரி (23), விரிதிமன் சகா (20), ராகுல் சர்மா (30), ஷாமி அகமது (20) ஓரளவு கைகொடுத்தனர். டிண்டா (1) ஏமாற்ற, இந்தியா "ஏ' அணி முதல் இன்னிங்சில் 202 ரன்களுக்கு சுருண்டது. வெஸ்ட் இண்டீஸ் சார்பில் கேப்டன் வீராசாமி பெர்மால் 5, ஜான்சன் 2 விக்கெட் வீழ்த்தினர்.

பின், இரண்டாவது இன்னிங்சை துவக்கிய வெஸ்ட் இண்டீஸ் அணி, இரண்டாம் நாள் ஆட்டநேர முடிவில் விக்கெட் இழப்பின்றி 6 ரன்கள் எடுத்து, 21 ரன்கள் முன்னிலை வகித்திருந்தது. பிராத்வைட் (4), குய்லன் (1) அவுட்டாகாமல் இருந்தனர்.